Mamlakatimiz Bosh konsulxonasi tomonidan Saudiya Arabistoni ishbilarmon doiralari vakillari, o'zbek diasporasi vakillari - Abdulaziz Marg'iloniy, Usoma Qo'qondiy va jurnalist Abdulaziz Qosim bilan uchrashuv tashkil etildi, deb xabar bermoqda «Dunyo» AA.

Suhbat chog'ida O'zbekistonda amalga oshirilayotgan islohotlar, xorijda yashayotgan vatandoshlarni qo'llab-quvvatlash bo'yicha olib borilayotgan sa'y-harakatlar, biznes yuritish borasida yaratilayotgan qulayliklar, respublikaning investitsiya, eksport va turizm sohalaridagi salohiyati haqida atroflicha fikr yuritildi.

Tadbirkor Abdulaziz Marg'iloniy O'zbekistonning tog'li hududlarida sayyohlik inshootlarni qurish loyihalari yuzasidan qiziqish bildirdi. Jumladan, u O'zbekistonga investitsiyalar kiritish maqsadida tashkil etilgan «Silk Valley» kompaniyasi Toshkent shahrida mehmonxona qurishni rejalashtirganini ma'lum qildi.

Mamlakatimizning Jidda shahridagi Bosh konsuli hozirgi kunda O'zbekistonda investorlarga barcha zarur sharoitlar yaratilayotganini alohida ta'kidladi.

Uchrashuvda saudiyalik jurnalist Abdulaziz Qosim Bosh konsulxona ko'magida nashrga tayyorlangan «O'zbekiston – ulamolar yurti» nomli kitobining taqdimotini birgalikda o'tkazish taklifini bildirdi. Bundan tashqari, u O'zbekistonning tog' turizmi imkoniyatlariga bag'ishlangan alohida kitob yozishni taklif qildi.

Ushbu taklif mamlakatimiz diplomatiya vakolatxonasi tomonidan yuqori baholandi.

Tadbir intihosida O'zbekistonda biznesni rivojlantirishga qiziqish bildirayotgan Saudiya Arabistoni kompaniyalarining vakillari bilan investitsiyalar va eksport sohasidagi o'zaro manfaatli hamkorlikning istiqbolli yo'nalishlarini batafsil muhokama qilish maqsadidagi uchrashuvlarni muntazam ravishda o'tkazishga kelishib olindi.

O'zbekiston musulmonlari idorasi matbuot xizmati