Allohning bayti – masjidlarni obod qilishga bugun har qachongidan ham e'tibor kuchaygan. Chunki bu ma'rifat maskanlari mo'min-musulmonlarning ilmini oshirish, bilimini yuksaltirishga xizmat qilmoqda.

Bugun, 2022 yilning 10 yanvar' kuni Toshkent viloyati Parkent tumani So'qoq qishlog'idagi “Kungay” jome masjidi foydalanishga topshirildi.

Tadbirda Toshkent viloyati bosh imom-xatibi Jasurbek domla Raupov, imom domlalar, mahalla faollari, homiylar, saxovatpesha tadbirkorlar ishtirok etdi.

Masjidning eski binosi 1880 yil hashar yo'li bilan qurilgan edi. Bor-yo'g'i 350 kishini o'z bag'riga oladigan masjid so'nggi yillarda namozxonlarga torliq qilib qoldi. Shuni inobatga olib, O'zbekiston musulmonlari idorasi Toshkent viloyati vakilligi rahbariyat bilan maslahatlashgan holda 2019 yil may oyida yangi masjid qurilishini boshlab yubordi.

Oradan ikki yarim yil o'tgach, So'qoqda go'zal ma'rifat maskani qad rostladi. Homiylar mablag'lari hisobidan bunyod etilgan jomeda ayni paytda 2–2,5 ming kishi bemalol ibodatlarni ado etishi mumkin.

Yangi jomega mos tarzda zamonaviy tahoratxona ham qurildi. Poklik maskanida barcha shart-sharoit yaratilgan.

Tadbir so'ngida xayrli duolar qilindi.

Toshkent viloyati vakilligi matbuot xizmati