Tasbeh va zikrda halovat bor
Bugungi sertashvish dunyoda qalblarimiz boylik, mol-dunyo to'plash, baland-baland imoratlar qurish, qimmat mashinalar minish bilan mashg'ul bo'lib qoldi. Kimdan so'rasangiz, orzulariga eta olmayotganidan, ko'ngli xotirjam emasligidan, huzur-halovat yo'qligidan noliydi.
Aslida, rizq-ro'z ham, mol-dunyo va farovon hayot ham imon quvvatida, ibodat va toatlar, tasbeh va zikrlar bardavomligidadir. Bejiz Alloh taolo Qur'oni karimda: «Ular imon keltirgan va qalblari Allohning zikri bilan orom oladigan zotlardir. Ogoh bo'lingizki, Allohni zikr etish bilan qalblar orom olur (va taskin topur)», demagan (Ra'd surasi, 28-oyat).
Qalbimiz zikr va tasbehlar bilan orom oladi. Chunki Buyuk Rabbimiz ko'plab oyati karimalarda – Hadid, Hashr, Saf suralari 1-oyatlar – «Osmonlar va Yerdagi (bor) narsa Allohga tasbeh aytur», deb marhamat qilgan bo'lsa, Jum'a va Tog'obun suralarining 1-oyatlarida «Osmonlardagi va Yerdagi (hamma) narsa Allohga tasbeh aytur», deyilgan.
Shuningdek, Isro surasi 44, Nur surasi 36, 41, Hashr surasi 24-oyatlarda ham etti osmon, Yer va ulardagi barcha mavjudot va maxluqot Parvardigorimizga tasbeh aytishi bayon etilgan.
Tasbeh va zikr qilishda ham ulug'larimizning tutgan yo'llari biz uchun ibratdir. Buyuk sahoba Abu Hurayra roziyallohu anhu bir kunda 12 ming marta tasbeh aytgan. U zotning oq ipi bo'lib, bu ipda mingta tugun bo'lgan. Shu ipni 12 marta aylantirib tasbeh sanamagunicha ko'ziga uyqu kelmagan.
Abu Hurayra roziyallohu anhu Rasululloh sollallohu alayhi va sallamdan eng ko'p hadis rivoyat qilgan sahoba. Shu ulug' sahoba arqonni tugun qilib olib, tasbeh sanagani uchun bid'atchi bo'ladimi? Alloh asrasin! U zotlar Nabiy alayhissalomning tarbiyalarini olgan, nabaviy axloq bilan xulqlangan edilar.
Abu Hurayra roziyallohu anhu bid'atchi bo'lmagan, shuningdek, ko'p zikr qilishlari va tasbeh aytshlari rivoyat qilingan ulug' zotlar ham aslo bid'atchi, zalolatga boshlovchi emas. Aksincha ular sunnat va hidoyat imomlaridir (Imom Ibn Abu Shayba, “Musnad”).
Abu Hurayra roziyallohu anhudan rivoyat qilinadi: “Men har kuni nafsim qarzini uzish uchun (Alloh yaratganiga shukr keltirish uchun) 12 ming marta tasbeh aytaman” (Imom Ibn Abu Shayba rivoyati).
Demak, har dardning davosi bor. Qalb xotirjamligining davosi zikr qilish, tasbeh aytishdir.
Aziz o'quvchi! Bir sinab ko'ring-a: har kuni o'zingiz bilan tasbeh va zikrlarni kanda qilmay aytib yuring. Tez orada qalbingiz xotirjam bo'ladi, huzur-halovat topasiz. Alloh taolo umringizga, rizqingizga baraka kiritib qo'yadi.
Tolibjon NIZOM
Siz orzu qilasizmi yoki maqsadmi...?
Bismillahir Rohmanir Rohiym
Agar maqsad va orzularingiz yozilgan kundaligingizni ko‘rsatsangiz, men sizga besh yildan keyin qayerda bo‘lishingizni yoki nima bilan shug‘ullanishingizni aytib bera olmayman. Ammo kundalik odatlaringizni ko‘rsatsangiz, besh yildan keyin qanday insonga aylanishingizni taxmin qila olaman.
Unutmang! Kelajak faqat maqsadlar bilan qurilmaydi. U har kuni takrorlanadigan kichik odatlar ipidan to‘qiladi.
Xulosa shuki, agar kelajagingizni bilmoqchi bo‘lsangiz, maqsadlaringizga emas, kundalik odatlaringizga e’tibor bering.
Har bir insonning o‘z maqsadlari bor. Kimdir 10 million so‘m topishni, kimdir 10 kilogramm vazn tashlashni, yana kimdir esa YouTubeda mashhur bo‘lishni orzu qiladi…
Biroq maqsadning o‘zi yo‘lni belgilamaydi. Yo‘lni kundalik odatlar belgilaydi. Masalan, 10 kilogramm ozishni istagan inson bunga faqat sog‘lom ovqatlanish va muntazam mashq qilishni odatga aylantirsagina erisha oladi.
Aksariyat odamlar esa bir necha kun tartibga amal qiladilar, keyin yana eski odatlariga qaytib ketadilar. Natijada, ularning maqsadlari devorga ilingan chiroyli rasmdek qolib ketadi. Chunki maqsad odatga aylanmadi.
Maqsad qo‘yish oson. Ammo odatni shakllantirish sabr, intizom va mehnat talab qiladi.
Odat bu – muntazam takrorlanadigan, vaqt o‘tishi bilan inson tabiatining bir qismiga aylanadigan xatti-harakatdir. Shunday darajaga yetadiki, uni deyarli o‘ylamasdan bajarasiz.
Aynan kundalik odatlar odamlar o‘rtasidagi eng katta farqni yuzaga keltiradi. Agar odatlaringizni yaxshilasangiz, maqsadlaringizga yaqinlashasiz.
Demak, har kuni odatlarimizni oz bo‘lsa-da, yaxshilashga intilishimiz kerak. Ana shu kichik, ammo barqaror qadamlar hayotimizda katta o‘zgarishlarni boshlaydi.
Biz har kuni yaxshiroq bo‘lishni tanlasak, kelajagimiz ham shunga yarasha go‘zal bo‘ladi.
Oisha roziyallohu anhodan rivoyat qilinadi: «Rasululloh sollallohu alayhi vasallamdan “Qanday amal Alloh uchun eng mahbubdir?”, deb so‘raldi. U zot alayhissalom: “Oz bo‘lsa ham, davomlisi”, dedilar» (Imom Termiziy rivoyati).
Sizning qanday maqsadlaringiz bor? So‘nggi kunlarda qaysi maqsadlaringizga erishish uchun harakat qilyapsiz?
Davron NURMUHAMMAD
