Shu yil 30 dekabr' kuni O'zbekiston musulmonlari idorasida 2021 yilda diniy-ma'rifiy sohada amalga oshirilgan ishlar va erishilgan natijalarga bag'ishlangan yig'ilish bo'lib o'tdi.
Tadbir Qur'oni karim tilovati va xayrli duolar ila boshlandi.

Muftiy hazratlari Islom dini ma'rifatini keng yoyish, mo'min-musulmonlar ehtiyojini ta'minlash va masjid-madrasalarni obod etish yo'lida qilingan ishlar haqida so'z qildilar. Shuningdek, Davlatimiz rahbari tomonlaridan diniy-ma'rifiy sohani rivojlantirishga berilayotgan diqqat-e'tiborni mamnuniyat ila qayd etdilar.

Nutqda ta'kidlangan asosiy ishlarga to'xtaladigan bo'lsak, o'tayotgan yilda 25 ta yangi masjid ochildi. 96 ta jome yangidan qurildi, 123 tasi kapital ta'mirlandi. Ayni kunlarda 250 ta masjidda qayta qurish ishlari davom etmoqda. 2022 yilda 160 ta masjidni yangidan qurish ishlari boshlanadi.

Halqaro islom akademiyasida 820 nafar imom-xatib, 810 nafar imom noibi bilim va ko'nikmalarini oshirdi. Hududlarda imom-xatiblarning qiroat, aqida, fiqh bo'yicha ilmlarini sayqallash bo'yicha sa'y-harakatlar olib borilmoqda. 200 nafar muazzinning azon aytish mahorati oshirildi.

Barcha hududlar, ayniqsa, olis va chekka tumanlarda ulamolarimiz aholi bilan suhbatlar tashkil qildilar. Bunday ishlar hududlar miqyosida davom etmoqda. Imom-xatiblar homiylarni jalb qilgan holda yordamga muhtoj kishilarga jami 15 mlrd. so'mlik moddiy yordamlar uyushtirdilar. Diniy soha xodimlarini moliyaviy qo'llab-quvvatlash borasida ham salmoqli ishlar qilindi.

Oliy va o'rta maxsus madrasalarga qabul kvotalari o'tgan yillarga nisbatan ko'tarildi. Diniy ta'lim berish sifatini tubdan yaxshilash bo'yicha fan dasturlari qayta ishlab chiqildi. Ikki nafar ulamo Azizxo'ja Inoyatov va Soatmurod Primov Falsafa fanlari doktori (PhD) ilmiy unvonini oldi, yana bir qator soha xodimlari ilmiy ishlarni davom ettirmoqda.

Tashkil etilgan “Qur'oni karim va tajvid” o'quv kurslari soni 21 taga etdi. Shu kunga qadar 22 mingdan ziyod kishiga qiroat bo'yicha boshlang'ich ilmlar berildi. Ayni kunlarda ushbu o'quv kurslarda 2,5 ming kishi tahsil olmoqda.
Fatvo ishlarini kengaytirish uchun malakali mutaxassislar ishga olindi, moddiy-texnik bazasi mustahkamlandi. Natijada, joriy yil davomida Koll-markaz orqali 200 mingga yaqin savollarga javob berildi.

“Hidoyat sari” ko'rsatuvi negizida “Muftiy minbari” rukni tashkil etildi. “Madaniyat va ma'rifat” telekanalida “Ma'rifiy suhbatlar” nomli yangi turkum ko'rsatuv tasvirga olindi. Shuningdek, “O‘zbekiston” va hududiy telekanallarda “Zikr ahlidan so'rang” nomli ko'rsatuv efirga uzatila boshlandi. Imom-domlalarga tegishli bo'lgan 50 dan ziyod sayt va 300 dan ortiq ijtimoiy tarmoqlarda ma'rifat ulashish ishlari izchil davom etmoqda.

Umra safarini tashkil etish bo'yicha qilingan sa'y-harakatlar ham o'zining natijasini bermoqda. Alloh nasib etsa, tez orada mavjud ehtiyot choralari ko'rilib, muborak safar boshlanadi.

Muftiy hazratlari barcha soha xodimlarini islom ummati va o'lkamiz farovonligi yo'lida elkami-elka mehnat qilishga da'vat etdilar. Diniy soha xodimlari avvalo, Haq taolo va dinimiz oldidagi mas'uliyatni ixlos ila ado etish, xalqimiz tomonidan bildirilgan ishonchni oqlash darkorligi, buning uchun esa tinimsiz mehnat qilish zarurligini alohida qayd etdilar.

Muloqotda so'zga chiqqanlar tomonidan bugungi hayot talablari qat'iylashib borayotgani, zamonaviy tahdidlar va xurujlarga soha xodimlari birinchi navbatda qarshi turishlari ta'kidlandi. O'z navbatida, har bir diniy soha xodimi o'zi mas'ul bo'lgan ishga vijdonan yondoshishi bilan bir qatorda zimmasiga yuklatilgan vazifalarni sidqidildan bajarish kabilar ta'kidlandi.

Joriy yilda yutuq va muvaffaqiyatlarga erishishda salmoqli xizmat ko'rsatgan, faol va fidoyi bir guruh xodimlarga Maqtov yorlig'i va mukofotlar topshirildi.

Yig'ilish yakunida Diniy idora tizimida ko'p yillar mehnat qilgan mo''tabar ulamolar, taniqli ustozlar, xususan, rahmatli Usmonxon domla Temirxon o'g'lining din yo'lidagi xizmatlari yodga olinib, ularning solih amallarini o'zlariga hamroh aylashini Alloh taolodan so'rab, duoi xayrlar qilindi.

O'zbekiston musulmonlari idorasi matbuot xizmati