Birlashgan Millatlar Tashkilotining Butunjahon turizm tashkiloti (UNWTO) Bosh assambleyasi 2023 yilda Samarqand shahrida o'tkaziladi, deb xabar bermoqda «Dunyo» AA.

Turizm va sport vazirligi ma'lumotiga ko'ra, bu haqda O'zbekiston Bosh vaziri o'rinbosari Aziz Abduhakimov Ispaniyaning Madrid shahrida bo'lib o'tayotgan UNWTOning 24-sessiyasi doirasidagi ovoz berish jarayoni natijalariga ko'ra ma'lum qildi.

— Shunisi diqqatga sazovorki, tarixda birinchi marta BMT oilasi tarkibiga kiruvchi tashkilotlarning Bosh assambleyasi O'zbekistonda bo'lib o'tadi, — dedi mamlakatimiz Bosh vazirining o'rinbosari. — Bularning barchasi davlatimiz rahbari tomonidan olib borayotgan siyosat, turizm sohasini rivojlantirish hamda bu orqali mamlakatimizning jahon sahnidagi nufuzini oshirish yo'lidagi sa'y-harakatlar natijasidir.

Ta'kidlash lozimki, UNWTO Bosh assambleyasi 25-sessiyasining qadimiy Samarqandda o'tkazilishi bu erga mingdan ortiq xorijlik mehmonlarning tashrif buyurishi O'zbekiston turizm salohiyatini xalqaro ko'lamda yanada kengroq targ'ib qilishga xizmat qiladi. Bundan tashqari, yuqori darajadagi tadbir jahon ommaviy axborot vositalarining ham e'tiborini tortadi.

Shu o'rinda qayd etish joizki, Butunjahon turizm tashkiloti va unga a'zo davlatlar bilan hamkorlik munosabatlarini rivojlantirish, shuningdek, mamlakatimizning xalqaro maydondagi nufuzini oshirish, xalqaro tashkilotlar bilan munosabatlarini yanada kengaytirish maqsadida 30 noyabr' - 2 dekabr' kunlari O'zbekiston delegatsiyasining Ispaniyaga tashrifi tashkil etildi. 24-sessiyada ishtirok etgan O'zbekiston delegatsiyasi tarkibidan Turizm va sport vazirligi, Madaniyat vazirligi, Samarqand viloyati hokimligi hamda O'zbekistonning Ispaniya qirolligidagi elchixonasi vakillari o'rin oldi.

Madrid shahrida o'tgan tadbir doirasida 2023 yilda UNWTO Bosh assambleyasini o'tkazish uchun O'zbekiston va Portugaliya da'vogarlik qildi. Tadbir yakuniga ko'ra, O'zbekiston yaqqol ustunlik bilan ovoz to'plab, 2023 yilgi Bosh assambleyani qadimiy Samarqand shahrida o'tkazilishi ma'lum qilindi.

UNWTO Bosh assambleyasi ikki yilda bir marta o'tkaziluvchi eng muhim turistik forum hisoblanadi.

O'zbekiston musulmonlari idorasi matbuot xizmati