O'zbekistonning Buyuk Britaniyadagi elchixonasi dunyoda etakchi ta'lim va tadqiqot muassasasi bo'lgan Oksford universiteti rahbariyati va olimlari bilan muzokaralar o'tkazdi, deb xabar qilmoqda «Dunyo» AA.

Oksford universiteti bilan O'zbekiston universitetlari va ilmiy-tadqiqot institutlari o'rtasida akademik hamkorlikni yo'lga qo'yish, ta'lim va ixtisoslashtirilgan mutaxassislar tayyorlash sohasida o'zaro aloqalarni mustahkamlash, shu jumladan, Blavatnik nomidagi davlat boshqaruvi maktabi va Buyuk Britaniya universiteti huzuridagi «Saïd» biznes-maktabida ixtisoslashtirilgan dasturlar doirasida munosabatlar o'rnatish muhokama qilindi.

Universitet prorektori Martin Uil'yams O'zbekistonda amalga oshirilayotgan keng ko'lamli islohotlar ta'lim, fan va kadrlar tayyorlash sohasidagi o'zaro hamkorlikni kengaytirish va mustahkamlashga xizmat qilayotganini alohida ta'kidladi.

Tarix, arxeologiya, ta'lim, tibbiyot, zoologiya, seysmologiya, muhandislik kabi sohalarda aloqalarni rivojlantirish uchun katta imkoniyatlar mavjudligi qayd etildi.

Markaziy Osiyo tarixiga oid qo'lyozma va manuskriptlar yig'ilgan mashhur Bodlean kutubxonasi bilan hamkorlikni kengaytirish imkoniyatlariga e'tibor qaratildi.

Oksford universiteti olimlari bilan uchrashuvlar chog'ida Markaziy Osiyodagi ijobiy o'zgarishlar samarasida akademik hamjamiyat o'rtasida mintaqa mamlakatlari tarixi va zamonaviy taraqqiyotini o'rganishga e'tibor kuchayayotgani ta'kidlandi.

Markaziy Osiyoning dunyo siyosiy xaritasidagi nufuzi va ahamiyatini oshirishga xizmat qiladigan qo'shma ilmiy tadqiqotlar o'tkazishga qiziqish bildirildi.

O'zbekiston musulmonlari idorasi matbuot xizmati