O'zbekistonning Qohiradagi elchixonasi tomonidan Misrning etakchi oliy ta'lim muassasalari bilan o'zaro manfaatli hamkorlikni mustahkamlash bo'yicha tizimli ishlar olib borilmoqda, deb xabar beradi “Dunyo” AA muxbiri.

Hususan, Qohira universiteti arxeologiya fakul'teti dekani Ahmad Rajab Rizq bilan muzokaralar o'tkazilib, ilm-fan sohadagi hamkorlikni mustahkamlash yo'nalishlari muhokama qilindi.

Ahmad Rizq 2008-2011 yillarda Misrning Toshkentdagi elchixonasi madaniyat bo'yicha maslahatchisi, vakolatxona huzuridagi Madaniyat markazi mudiri lavozimida faoliyat yuritgan, 2017 yilda “Buxoro asori atiqalari va islom tamadduni” nomli kitob nashr etgan. 2018 yil uning Samarqandga bag'ishlangan navbatdagi kitobi bosmadan chiqqan.

Hozirda arab va turk ilmiy manbalariga asoslanib, Toshkent, Hiva, Termiz va Farg'ona to'g'risidagi kitoblarni nashrga tayyorlamoqda. U O'zbekiston Prezidenti Shavkat Mirziyoevning 2020 yil avgustdagi farmoniga muvofiq «Do'stlik» ordeni bilan taqdirlangan.

Suhbat chog'ida Ahmad Rizq xalqlarimizning tarixiy mustahkam hamkorligi to'g'risida so'zlar ekan, ming yildan oshiq aloqalarni o'zida aks ettiruvchi mamluklar merosi, Ahmad Farg'oniyning Qohiradagi izlanishlari, Ayubiylar davrida 70 mingdan ortiq turkiy xalqlarning Misr zaminida qo'nim topishi, Qohira markazida “O'zbekiya” tumanining mavjudligi mamlakatlarimiz o'rtasidagi do'stlik rishtalarini mustahkamlashga asos bo'lib xizmat qilishini ta'kidladi.

Shu munosabat bilan Ahmad Rizq tomonidan Movaraunnahrning buyuk tarixini o'zida aks ettiruvchi 7 jildli kitob tayyorlangani, ushbu noyob qo'llanma asosida Qohira universiteti arxeologiya fakul'tetining 5 ming nafardan ortiq talabasi va 100 nafardan ziyod professor-o'qituvchisi magistrlik va doktorlik ishlarida faol foydalanayotganini qo'shimcha qildi.

Ahmad Rizq arxeologiya fakul'tetida tarixiy obidalarni ta'mirlash, islomiy me'morchilik va yog'och o'ymakorligini tadqiq etish, to'qimachilik, gilamchilik va zardo'zlik san'ati sirlarini o'rganishga ixtisoslashgan 3 ta laboratoriya ham mavjudligini ma'lum qildi.

Ushbu labaratoriyalarda islom dunyosi xalqlari, jumladan Buxoro, Samarqand, Horazm tarixiy-madaniy merosiga oid ma'lumotlar beriladi.

Muzokaralar yakunida ikki mamlakat o'rtasida ilm-fan va ta'lim sohasida imzolangan ikki tomonlama hujjatlar ijrosi doirasidagi hamkorlikni faollashtirish bo'yicha kelishuvga erishildi.

O'zbekiston musulmonlari idorasi matbuot xizmati