O'zbekiston elchisi Ravshan Usmanov Malayziya Menejment va fan universiteti (Management and Science University of Malaysia – MSU) asoschisi va Prezidenti Mohd Shukri bilan uchrashdi, deb xabar bermoqda "Dunyo"axborot agentligi.

2001 yilda tashkil etilgan MSU ta'lim menejmenti, turizm, marketing, biznes boshqaruvi kabi turli soha va mutaxassisliklar bo'yicha oliy ta'lim beruvchi etakchi Malayziya xususiy universitetlaridan biridir. Universitet turizm va mehmondo'stlik sohasida Malayziya universitetlari orasida 1-o'rinda turadi.

Bundan tashqari, MSU turli kasalliklarga chalingan bemorlarni davolash uchun "MSU Medical Centre" o'z ko'p tarmoqli tibbiyot markazi bor. Universitetda qo'lqop mahsulotlari ishlab chiqarish, dori-darmon va oziq-ovqat qo'shimchalarini ishlab chiqarish va qadoqlash, shuningdek, halol sanoatni tadqiq etish va malakasini oshirish bo'yicha ixtisoslashtirilgan markaz faoliyat ko'rsatmoqda.

Muzokaralar chog'ida MSUning O'zbekistonda halol sertifikat berish markazi va/yoki laboratoriyasini yaratish niyatlari haqida ham xabar berildi. Malayziya tomonining so'zlariga ko'ra, bu o'zbekistonlik oziq-ovqat mahsulotlari eksportchilari uchun mamlakatda ishlab chiqarilgan mahsulotlarni Janubi-Sharqiy Osiyo davlatlariga etkazib berish hajmini oshirish uchun noyob imkoniyat ochadi.

Uchrashuv yakunlari bo'yicha MSU rahbariyatining O'zbekistonga yana bir tashrifini tashkil etish bo'yicha yuqorida qayd etilgan loyihalarni amalga oshirish bo'yicha amaliy ishlarni boshlash tartibi va shartlarini o'rganish bo'yicha kelishuvga erishildi.

O'zbekiston musulmonlari idorasi matbuot xizmati