Avstriyaning «Kurier» nashri "O'zbekiston sayohat qilish uchun qo'riqlanadigan tabiatga ega eng yaqin ekzotik yo'nalishdir" maqolasini chop etdi, deb xabar bermoqda "Dunyo" axborot agentligi.

O'tgan yilning may oyida O'zbekistonga tashrif buyurgan Avstriya nashri turizm va hayot san'ati departamenti direktori Aksel' Halbxuberning maqolasida mamlakatimizning butunlay yangi sayyohlik qiyofasi, mamlakat tarixiy merosining qadr-qimmati, Buyuk Ipak yo'lini rivojlantirish uchun respublika shaharlarining ko'p asrlik ahamiyati, shuningdek, Osiyo qit'asida madaniyat, savdo, bilim va xalqaro munosabatlar haqida so'z boradi.

Nashr o'quvchilar e'tiborini respublika turizm industriyasining ko'p qirraliligiga qaratadi. "Agar siz barcha asosiy sayyohlik marshrutlarini ziyorat qilib bo'lganman deb hisoblasangiz, unda siz O'zbekistonga borishingiz kerak: beg'ubor tabiat va juda mehmondo'st odamlar bilan Buyuk Ipak yo'lining romantikasi", - deydi Aksel' Halbxuber.

O'zbekistonning barcha asosiy sayyohlik maskanlariga tashrif buyurgan maqola muallifi Qoraqalpog'istonning turistik salohiyatiga alohida urg'u beradi. "Bu alohida hikoya - Qoraqalpog'istonning g'ururi baland kishilari haqidagi hikoya. Mana, dunyodagi eng aql bovar qilmas qabristonlardan biri - Mo'ynoqdagi kemalar qabristoni. Ushbu hodisani ko'rishda ko'plab sayohatchilar o'z tasavvurlari chegaralariga erishadilar. Qoraqalpog'istonda siz nihoyatda samimiy insonlar va rus avangard san'atining eng yirik kollektsiyasi - Nukus shahridagi Savitskiy san'at muzeyini kashf etasiz", - ta'kidlaydi muallif.

Nashr respublikada amalga oshirilayotgan islohotlar va urbanizatsiya natijalarini ochib berar ekan, "Toshkent nafaqat joylashuvi, balki yosh aholi va turmush darajasining jadal o'sishi tufayli Markaziy Osiyoning iqtisodiy markaziga aylanish arafasida turibdi. Shahar shu qadar sur'atda yangilanmoqdaki, tez orada sovet davrida qurilgan binolar antikvariatga aylanib qoladi".

Shuningdek, muallif o'quvchilarga "Prezident Shavkat Mirziyoev boshchiligidagi O'zbekiston 2016 yildan buyon butun dunyoga ochilish yo'lidan borayotganligi"dan xabar beradi. Ichki va ziyorat turizmini rivojlantirish alohida ta'kidlanadi. Islom tsivilizatsiyasi durdonalariga tenglashtirilgan shahar va diqqatga sazovor joylar sanab o'tilgan.

Hiva shahrining asl holida saqlanib qolgan noyob maqbaralari, minoralari va madrasalari ham xalqaro, ham mahalliy sayyohlarni o'ziga jalb etish markaziga aylanmoqda, deyiladi maqolada.

Nashrning barcha o'quvchilarini O'zbekistonga turistik sayohat qilishga chorlagan Aksel' Halbxuber xorijiy sayyohlar orasida katta shuhrat qozonayotgan respublikaning chang'i kurortlarini ham qayd etadi.

O'zbekiston musulmonlari idorasi matbuot xizmati