O'zbekiston va Qozog'iston muftiylari muloqot qildilar
Bugun, 25 noyabr' kuni Nur-Sulton shahrida O'zbekiston musulmonlari idorasi raisi, muftiy Nuriddin domla hazratlari “Mustaqil Qozog'iston va Islom qadriyatlari” nomli xalqaro anjuman oldidan Qozog'iston musulmonlari idorasi raisi, bosh muftiy Navro'zbay hoji Tag'anuli janoblari bilan uchrashuv o'tkazdilar.
Samimiy muloqot chog'ida Qozog'iston bosh muftiysi Navro'zbay hoji janoblari muftiy Nuriddin domla hazratlariga nufuzli anjumanga tashrif uchun tashakkur aytib, yangi lavozimga saylanganlari munosabati bilan muborakbod etib, xayrli duo va tilaklarni bildirdilar. O'z navbatida muftiy Nuriddin domla ham Navro'zbay hoji Tag'anuliga samimiy taklif, xayrli duo va tilaklar uchun minnatdorlik bildirib, u kishining din yo'lidagi faoliyatiga ulkan muvaffaqiyat tiladilar.
Uchrashuv avvalida O'zbekiston bilan Qozog'iston o'rtasidagi hamkorlik diniy-ma'rifiy jabhada ham izchil rivojlanib, xalqlarimiz o'rtasidagi birodarlikni yanada mustahkamlanib borayotgani, bu ikki Davlat rahbarlarining oqilona siyosati tufayli o'zaro munosabatlar yangi bosqichga ko'tarilgani alohida ta'kidlandi.
Qozog'iston muftiysi Navro'zbay hoji O'zbekistondagi tarixiy obidalar, muborak qadamjolar ziyoratchilarning dunyoqarashi va ruhiy olamini boyitishini mamnuniyat ila qayd etdi.
Muftiy Nuriddin domla O'zbekiston musulmonlari idorasida amalga oshirilayotgan xayrli ishlar, mo'min-musulmonlarning diniy ehtiyojlarini qondirish, xususan Fatvo bo'limini kengaytirish, diniy savol-javoblarga ixtisoslashgan koll-markaz faoliyatini rivojlantirish va diniy ta'lim sifatini oshirish, kadrlar tayyorlash tizimini takomillashtirish kabi o'zgarishlarga alohida to'xtaldilar.
Muloqot yakunida O'zbekiston va Qozog'iston muftiylari ikki davlat rahbarlarining dinga muhabbatlari ziyodaligi bois mamlakatlarimizda Islom ma'rifatini keng taratish bo'yicha katta sa'y-harakatlar olib borilayotganini alohida e'tirof etishdi.
Marosim oxirida Qozog'iston bosh muftiysi Navro'zbay hoji O'zbekiston musulmonlari idorasi raisi, muftiy Nuriddin domla hazratlariga hadyalar ulashdilar.
Ikki davlat diniy idoralari raislari muloqotidan so'ng muftiy Nuriddin domla boshchiligidagi O'zbekiston delegatsiyasi vakillari Qozog'iston muftiysi naibi O'ngar domla Yershat Agibay o'g'li hamrohligida Qozog'iston musulmonlari diniy boshqarmasi faoliyati bilan yaqindan tanishdilar.
O'zbekiston musulmonlari idorasi matbuot xizmati
Allohim, menga rahm qilgin
Abu Bakr roziyallohu anhudan rivoyat qilinadi. U kishi Rasululloh sollallohu alayhi va sallamga: “Ey Allohning Rasuli! Menga bir duo o‘rgating, men uni namozda o‘qib yuray”, dedilar. Shunda Rasululloh: “Allohumma inniy zolamtu nafsiy zulman kasiyron. Va innahu laa yag‘firuz zunuuba illaa anta. Fag‘fir liy mag‘firotan min ’indika varhamniy, innaka antal g‘ofuurur rohiym”, dedilar.
Ma’nosi: “Allohim! Albatta, men o‘zimga ko‘p zulm qildim va Sendan o‘zga gunoh larni kechiruvchi yo‘qdir. Meni huzuringdan bo‘lgan mag‘firat bilan kechirgin va menga rahm qil gin! Albatta, Sen ko‘p kechiruvchi va o‘ta rahmli Zotsan” (Imom Buxoriy rivoyati). Yaxshilik bilan mukofotlasin Usoma ibn Zayd roziyallohu anhudan rivoyat qilinadi. Rasululloh sollallohu alayhi va sallam: «Kimga bir yaxshilik qilinsa, uni qilgan kishiga “Jazaakal lohu xoyron” desa, maqtovni oxiriga yetkazgan bo‘ladi», dedilar.
Ma’nosi: “Alloh seni yaxshilik bi lan mukofotlasin” (“Sunani Termiziy”). Boshqalardan behojat qilgin Ali ibn Abu Tolib roziyallohu anhu rivoyat qiladi. «Bir mukotab (ozod bo‘lish uchun to‘lov to‘lashga xojasi bilan shartnoma tuzgan qul) oldimga kelib: “Men kelishilgan mablag‘ni topib bera olmay qoldim. Menga yordam bering”, dedi. Men unga Rasululloh sollallohu alayhi va sallam o‘rgatgan kalimalarni o‘rgatdim: “Allohummakfiniy bi halaalika ’an haroomik, va ag‘niniy bi fazlika ’amman sivaak”.
Ma’nosi: “Allohim, haromingsiz haloling bilan menga kifoya qilgin va fazling ila meni O‘zingdan boshqalardan behojat qilgin” (Sunani Termiziy).
“Hidoyat” jurnalining
2025 yil 6-sonidan
