Mamlakatimizning Misrdagi elchixonasi ko'magida O'zbekiston Islom tadqiqotlari markazi hamda Misr Kitoblar uyi va Milliy arxivi mutaxassislari o'rtasida onlayn-muzokaralar o'tkazildi, deb xabar bermoqda «Dunyo» AA.

Uchrashuvdan ko'zlangan maqsad qo'lyozmalarni restavratsiya qilish sohasida hamkorlikni yo'lga qo'yish va rivojlantirishdan iborat bo'ldi.

Muzokaralar natijasida idoralararo hamkorlikning asosiy yo'nalishlarini belgilab beradigan o'zaro anglashuv memorandumining yakuniy tahriri ma'qullandi.

Har bir xalqning tarixi va madaniyatini o'rganishda qo'lyozma kitoblar katta ahamiyatga ega ekani ta'kidlandi. O'zbekiston muzeylari va kutubxonalarida juda ko'p qo'lyozmalar saqlanmoqda.

Ularni saqlash va asrab avaylash, ilmiy tadqiq etish va kelgusi avlodlarga etkazish masalalari mamlakatimiz rahbariyati jiddiy e'tiboridagi masala ekani qayd etildi.

O'zbekistonda kitoblarni indeksatsiya qilish, tiklash, raqamlashtirish va chop etishda Misr tajribasini qo'llash muhimligiga e'tibor qaratildi.

Shu nuqtai nazardan, misrlik yuqori malakali mutaxassislarning O'zbekistonga amaliy safarini tashkil etish masalasi bo'yicha fikr almashildi.

Savdo-iqtisodiy va ilmiy-texnikaviy hamkorlik bo'yicha O'zbekiston-Misr hukumatlararo komissiyasining bo'lajak 7-majlisi doirasida O'zaro anglashuv memorandumini imzolash bo'yicha kelishuvga erishildi.

O'zbekiston musulmonlari idorasi matbuot xizmati