2016 йилда Ўзбекистонда ҳокимиятга келган президент Шавкат Мирзиёев фуқароларнинг диний эркинликларини таъминлаш борасида қатор ижобий ўзгаришларнинг ташаббускори бўлди. Kun.uz интернет нашри соҳадаги ислоҳотлар борасида Ўзбекистон мусулмонлар идораси Тошкент шаҳар вакиллиги ахборот-таҳлил бўлими бошлиғи Саҳобиддин домла Сатимов билан суҳбатлашди.

«2 мингдан ортиқ масжидларимизда айтилаётган азонлар – бунга муштоқ бўлган инсонларнинг қалбларига малҳам, уларнинг дилларини қувнатувчи нур бўлиб кирмоқда. Бу ҳам Аллоҳ таолонинг мўминларга улкан бир неъматидир. Гўзал масжидларимиз инсонларнинг тафаккурига яхши таъсир қилади, одамлар у ердан ибрат ва намуна олади. Бундан ташқари, масжидлар шаҳарларнинг кўркидир», – дейди Саҳобиддин домла.

Шавкат Мирзиёев марҳум шайх Муҳаммад Содиқ Муҳаммад Юсуф ҳазратларининг меҳнатларини эътироф этиб, Тошкент шаҳрида унинг номида катта масжид қурилишига ташаббускор бўлди. Шайх Муҳаммад Содиқ Муҳаммад асос солган «Ҳилол нашр» нашриётида эса Ўзбекистонда тарихида илк бор Мусҳафи шариф – Қуръони Карим чоп қилиш бошланди.

2018 йилда президент ташаббуси билан туман, вилоят ва республика босқичларида Қуръон мусобақаси ўтказилди.
«Аллоҳ таоло Қуръони Каримда «Агар сизлар Аллоҳнинг берган неъматларига шукр қилсангиз, уни мен зиёда қиламан» (Иброҳим сураси, 7-оят) – дея марҳамат қилади. Халқимиз шукр ва дуода бўлди, натижада 2018 йил жуда юқори савияда республика миқёсида «Қуръони Карим - 2018» мусобақаси ҳамда «Ҳадис илми», «Араб тили билимдони» мусобақалари ташкил қилинди. Республика миқёсида олий ўрин олган Қуръон ҳофизлари «Президент совғаси» билан тақдирланди.

Бундан ташқари, ҳозирги кунда 17 мингдан ортиқ юртдошларимиз «Қуръон ва тажвид» курсларида ўқимоқда», дейди домла.

Шунингдек, Тошкентда президент ташаббуси билан Ислом илмларининг ривожланиши ва бой тарихий меросимизни ўрганишга мўлжалланган Ислом цивилизация маркази қурилмоқда.

2017-2018 йиллар давомида радикал диний оқимларнинг тарафдорлари деб ҳисобланган ёки таъсирига тушиб қолган 20 минг нафардан ортиқ ўзбекистонликлар ҳуқуқни муҳофаза қилиш идораларининг «қора рўйхати»дан чиқарилди. Шунингдек, сўнгги йилларда экстремизм ва терроризмга алоқадорлиги сабабли озодликдан маҳрум қилиш тарзидаги жазони ўтаётган, қилмишидан пушаймон бўлган 2 мингдан ортиқ шахслар афв этилди ва 1,5 мингдан зиёди жазони ўташ жойларидан озод қилинди.

2018 йилда мустақил Ўзбекистон тарихида илк бор «Вақф» фонди ташкил қилинди. Закот ва хайриялардан тушадиган маблағлар шу фонд орқали муҳтожлар, таълим муассасалари, беморлар ва бошқа хайрли мақсадларда ишлатиладиган бўлди.

«Бизнинг халқимиз яхшилик йўлида Аллоҳнинг арқонини маҳкам тутувчи ва яхшилик қилиш билан завқланадиган халқ. Фонд COVID-19 пандемияси туфайли қийин аҳволга тушиб қолган аҳоли қатламларига, беморларга, диний билим юртлари талабаларига, тарихий обидаларимизни тиклаш учун жуда катта ёрдамлар бермоқда», – дейди домла.

2019 йилдан бошлаб президент ташаббуси ва назорати остида 5 марта «Меҳр» операцияси ўтказилди ва Яқин Шарқдаги можаро ҳудудларидан юзлаб юртдошларимиз қайтариб олиб келинди. Олиб келинганларга керакли моддий ва тиббий ёрдамлар кўрсатилди, шунингдек, реабилитация қилиниб шахсий ҳужжатлари тиклаб берилди.

«Ҳаж мусулмонлар қалбининг тўрида турган муқаддас амал. Халқимиз аста секин фаровонликка эришмоқда. Натижада 2019 йилда Умра зиёратига борувчилар сонига қўйилган квота олиб ташланди. Ҳаж зиёратига борувчилар сони ҳам 7200 нафарга оширилди. Иншааллоҳ бунинг сони янада кўпайишидан умидвормиз. Шунингдек, Тошкент-Мадина йўналишида авиақатновлар йўлга қўйилиб, муқаддас зиёратгоҳларга борувчиларнинг узундан узун навбатлари йўқолиб, халқ учун енгилликлар яратилди», – дейди Саҳобиддин домла Сатимов.

2019 йилда президентнинг сиёсий иродаси ва қарори билан Қорақалпоғистонда жойлашган халқ учун «ичкаридаги» қийноқларнинг рамзи ва борса келмас дея таърифланадиган Жаслиқ қамоқхонаси ёпилди.

Албатта, бундай ижобий ўзгаришлар мамлакатнинг халқаро имижига ҳам таъсир қилмай қолмаяпти. Ўзбекистон 2020 йил АҚШнинг диний эркинлик бўйича «Махсус кузатувдаги давлатлар рўйхати»дан чиқарилди.
Бундан ташқари, расмий доиралар томонидан марҳумлар ёд этилаётгани, уларнинг ҳақига Қуръон тиловатлар қилиниб, эҳсон дастурхонлари ёзилаётгани ҳам алоҳида эътирофга лойиқдир.

Ушбу материал Вазирлар Маҳкамаси ҳузуридаги Дин ишлари бўйича қўмитанинг тегишли экспертиза хулосаси асосида тайёрланган.

Ўзбекистон мусулмонлари идораси матбуот хизмати

Ота-она борки, фарзандининг тинч ва осуда Ватанда соғлом ўсиб-улғайиши, замонавий илм-фан ва касб-ҳунарларни эгаллаб, оиласига, юртига таянч бўлишини истайди. Мамлакатимиз таълим-тарбия тизимидаги туб ислоҳотлар эса ҳар бир оилага, ота-онага эртанги ёруғ кун учун катта ишонч бераётгани ҳақиқат.

Маълумки, 2021-йил юртимизда “Ёшларни қўллаб-қувватлаш ва аҳоли саломатлигини мустаҳкамлаш йили”, деб номланди. Мазкур рамзий йил номига мос равишда қабул қилинган Давлат дастури асосида бажарилган ишлар моҳиятига чуқур аҳамият қаратилса, ҳар қандай иқтисодий ривожланиш асосида, энг аввало, ёшлар камолоти устувор аҳамият касб этиши намоён бўлади. Бу бежиз эмас, албатта. Зеро, давлатимиз раҳбари таъкидлаганидек, “Ҳар қандай жамият тараққиётида ҳал қилувчи ролни ушбу жамиятнинг келажаги бўлган ёш авлоднинг соғлом ва баркамол ривожланиши ўйнайди. Шунинг учун ислоҳотларимизни кенгайтириш ва самарадорлигини янада ошириш масалаларида биз замонавий билим ва кўникмаларга эга бўлган ғайратли, ташаббускор, ҳар томонлама ривожланган ёшларимизни ўзимизга таянч деб биламиз”.

Дарҳақиқат, фарзандларимизнинг келажакда рақобатбардош кадрлар бўлиб шаклланиши, аввало, уларнинг ёшлигида олган одобахлоқи ҳамда илм-у маърифатига боғлиқ. “Ёшликда олинган билим тошга ўйилган нақш кабидир”, дейди донишмандлар. Шу боис, ёшларнинг таълим олиши, касбҳунар эгаллаши, етук инсонлар бўлиб улғайиши йўлида замонавий, илғор-инновацион шарт-шароитларни яратиб бериш учун юртимизда бор куч ва имкониятлар ишга солинмоқда.

Хабарингиз бор, шу ҳафта бошида Президентимиз Шавкат Мирзиёев ҳузурида 2022-йил учун солиқ тушумлари ҳамда бюджет параметрлари юзасидан йиғилиш ўтказилди. Унда давлатимиз раҳбари томонидан мамлакатимизда инсон қадрини улуғлаш, одамлар ҳаётини яхшилаш асосий мақсад этиб белгилангани ва бу тамойиллар бюджетни шакллантиришда асосий мезон бўлиши зарурлиги таъкидланди. Шунга мувофиқ, Президентимиз келгуси йилга мўлжалланган давлат бюджети лойиҳасида ҳам аввало, ижтимоий йўналишларга катта эътибор қаратиб, таълим ва тиббиёт тизимига кўзда тутилган 58 триллион сўм маблағга қўшимча тарзда яна 12 триллион сўм ажратиш таклифини билдирди. Зотан, ёш авлод таълим-тарбияси ва сиҳат-саломатлигига устувор аҳамият қаратилиши бугун халқимиз интилаётган Учинчи Ренессанс – янги Уйғониш даврига қўйилажак пойдеворнинг мустаҳкам бўлиши гаровидир. Табиийки, юқорида қайд этилган маблағларнинг барча таълим бўғинларини, хусусан, олий таълимни ривожлантиришдаги ўрни аниқ ҳисоб-китоблар асосида белгилаб берилди.

Ўзбекистон раҳбари ёшлар истиқболи учун ажратилган сармоя келажак учун қўйилган энг самарали сармоя, таълим даражаси ва сифати эса, ҳар қандай давлатнинг истиқболини белгилаб берадиган муҳим омил эканини бот-бот таъкидлаб келмоқда. Шу мақсадда мамлакатимизда Мактабгача таълим вазирлиги ташкил этилди, мактаб таълим тизими тубдан ислоҳ қилиниб, 11 йиллик умумий ўрта таълим замон талаблари асосида қайта жорий этилди. Ҳудудларда янги олий таълим муассасалари, илмийдиний ва ижодий марказлар ташкил этилмоқда. Олий ўқув юртларига қабул квоталари сезиларли даражада кенгайтирилди. Сиртқи ва кечки олий таълим шакллари тикланди.

Кейинги икки йил ичида ривожланган давлатларнинг 20 га яқин нуфузли университетлари филиаллари очилди. Бу бугун улуғ орзу-мақсадлар билан вояга етаётган ўғил-қизларимизга рағбат бериб, келгусида ўз танлаган касби бўйича етук мутахассис бўлишига ишонч уйғотмоқда.

Шунингдек, фарзандларимизнинг ёшликдан билим, касб-ҳунар эгаллаши ҳамда истеъдодларини тўлиқ намоён этиши учун 5 та муҳим ташаббуснинг илгари сурилгани Ўзбекистон тарихида ёшлар таълим-тарбияси бўйича яна бир янги босқични бошлаб берди, десак муболаға бўлмайди. Давлатимиз раҳбарининг бу эзгу ғояси Ўзбекистон халқи, айниқса, ёшлари томонидан катта қизиқиш билан қарши олиниб, қисқа вақтда мамлакат бўйлаб кенг қулоч ёзгани бежиз эмас. Чунки ёш авлодни ҳар томонлама қўллаб-қувватлаш, маънавий етук, жисмонан соғлом, ватанпарвар ва фидойи этиб тарбиялаш, ҳуқуқ ҳамда манфаатларини ҳимоя қилишга эътибор қанча кучайтирилса, унинг самараси ҳам шунча юқори бўлиши шубҳасиз. Шу боис, Ўзбекистонда жамиятнинг фаол қатлами бўлган ёшларга ўзини “ривожланган” ҳисоблаган айрим давлатлар сингари “муаммо” деб эмас, балки юрт равнақини таъминловчи катта куч сифатида қарамоқда. Натижада бугун юксак билимли, замонавий фикрлайдиган, қатъий позиситяга эга ёшлар мамлакатнинг эртанги тараққиётида тобора ҳал қилувчи кучга айланиб боряпти.

Муҳими, Президентимиз Шавкат Мирзиёев томонидан нафақат мамлакатимиз, балки, бутун дунё ҳамжамияти эътибори ҳам ёшлар таълим-тарбияси, маънавияти ва ҳуқуқлари ҳимоясига қаратилиб, Ёшлар ҳуқуқлари тўғрисидаги БМТ конвенсиясини қабул қилиш таклифи илгари сурилгани катта аҳамиятга эга. Ушбу таклиф халқаро ҳамжамият томонидан ҳам илиқ қарши олинди. Зотан, бугун дунё миқёсида ёшлар сони икки миллиарддан ортиқ бўлгани ҳолда, ахборот хуружлари, “оммавий маданият”, халқаро терроризм ва эсктремизм каби чегарасиз таҳдидлар шиддат билан ўсиб бораётгани мурғак ва беғубор қалбларни ишончли ҳимоя қилиш заруратини юзага келтираётгани очиқ ҳақиқат. Афсусланарлиси, ушбу таҳдидларнинг пайдо бўлишида айрим ғаразли мақсаддаги кучлар дин ва давлатни бирбирига мухолифат сифатида кўрсатишга, айниқса, муқаддас ислом дини асосларини бузиб талқин этишга ҳаракат қилмоқда.

Маълумки, Қуръони карим оятларининг илк сўзи “Иқро” (яъни, ўқи) буйруғи билан нозил бўлган. Шунинг ўзиёқ муқаддас динимизда илммаърифатга қанчалик эътибор қаратилганидан далолат эмасми?! Чунки динимиз илм-маърифат дини бўлиб, унда жаҳолат ва илмсизлик ҳамиша қораланган. Дунёнинг ободлиги, бардавомлиги ва бахт-саодати, албатта, илм ва маърифат билан чамбарчас боғлиқ. Ҳазрати Али розияллоҳу анҳу “Илм молдан яхшидир, у сени ҳимоя қилади, молни эса сен қўриқлашга мажбурсан, илм ҳоким, мол маҳкумдир, сарфлаш, нафақа қилиш билан мол камайса, илмни тарқатганинг сайин кўпайиб боради”, деган.

Имом Бухорий ривоят қилган Ҳадиси шарифда: “Болаларингизга одоб беринглар ва одобларини чиройли қилинглар”, дейилади. Фарзанд таълим-тарбияси хусусида Имом Ғаззолий ўзининг “Иҳёу улумуд дин” асарида “Бола – ота-она қўлидаги омонат. Унинг қалби турли нақш ва расмлардан холи. Қандай нақш солинса, қабул қилади… Агар яхшиликка ундалса ва ўргатилса, саодатли бўлади. Отаонаси ҳамда одоб, таълим-тарбия берган устозлар унинг савобига шерик бўлади…” деб ёзади.

Дарҳақиқат, бугун дунё инсон нигоҳида ҳалқаланган кўзёшдек қалқиб турган бир пайтда ёшларни чалғитувчи, уларни ўз домига тортишни истовчи турли ғаразли кучлар кўпайиб боряпти. Энг ачинарлиси, дунёнинг қайси бурчагида бирор жиноят содир этилса, албатта, бунда ёшларнинг ғўрлиги, оқ-қорани ҳали тўлиқ ажрата олмаслигидан фойдаланиляпти.

Таҳлиллар шуни кўрсатмоқдаки, оилада фарзанд тарбиясига эътиборсизлик нафақат ўша хонадон, балки бутун бир миллат, халқ маънавий таназзулига асос бўлиши мумкин экан. Бунга тарихда мисоллар кўп. Бугун дунёда инсон капитали учун кураш, энг катта сармоя фарзанднинг билимли бўлишига, тарбиясига тикилаётган бир вақтда, минг афсуски, айрим оилаларда фарзанд тарбиясига эътиборсизлик ҳолати ҳам йўқ эмас. Шу боис, Пайғамбаримиз Муҳаммад соллаллоҳу алайҳи васалламнинг “Ҳеч бир ота-она фарзандига гўзал тарбиядан кўра, қимматлироқ мерос қолдира олмайди”, деган ҳикматларини унутмаслигимиз лозим.

Шу маънода, 2020-йилдан умумий ўрта таълим мактаблари ўқув дастуридан “Тарбия” фанининг ўрин олгани бежиз эмас. Давлатимиз раҳбари томонидан илгари сурилган ташаббус асосида Ўзбекистон халқаро ислом академияси ҳузурида ташкил этилган муаллифлар ва экспертлар гуруҳи иштирокида яратилган янги фан дарсликлари ўқувчиларнинг ёши ва психофизиологик хусусиятлари инобатга олинган ҳолда, уларнинг онгига умуминсоний қадриятлар ва юксак маънавиятни янада чуқур сингдириш, уларни ватанпарварлик ва инсонпарварлик руҳида тарбиялашга хизмат қилиши назарда тутилган. “Тарбия” фани дастури миллий тарбиямиз ўзаги ва Абу Райҳон Беруний, Имом Бухорий, Абу Наср Форобий, Юсуф Хос Ҳожиб, Алишер Навоий, Ҳусайн Воиз Кошифий, Абдулла Авлоний, Маҳмудхўжа Беҳбудий, Абдурауф Фитрат каби улуғ мутафаккирларимизнинг маънавий-илмий меросига асосланган. Айни вақтда халқаро тажрибалар асосида замонавий тарбия технологияларидан фойдаланилгани янги фаннинг замон билан ҳамнафаслигига хизмат қилмоқда.

Тан олиб айтиш жоизки, яқин-яқингача умумий ўрта таълим мактабларида ўқувчилар тарбиясига уларнинг таълимдан бўш вақтида амалга ошириладиган қўшимча юклама – иккинчи даражали иш сифатида қараш тенденсияси кучаяётгандек эди. Бунинг оқибатида тарбия узуқ-юлуқ жараёнга айланиб, отаона ва ўқитувчи ўртасида муаллақ туриб қолди. Минг афсуски, ушбу жараённинг асорати бугун турли ғаразли кучлар алдовига учиб, нотўғри йўл ва ғоялар таъсирига тушиб қолган ёшлар тақдирида қора доғ қолдирмоқда.

Биз буюк тарих, буюк давлат, буюк маданият яратган, дунё тамаддуни ривожига улкан ҳисса қўшган, донишманд халқ фарзандларимиз. Бунинг асоси эса илм-маърифат, бағрикенглик ва ўзликни англаш аждодларимизнинг доимий интилиши, мақсад-муддаоси бўлганидадир. Зотан, IX–XII асрларда минтақамизда юз берган Биринчи Шарқ Уйғониш даврида ҳам, бутун дунёда Темурийлар даври Ренессанси дея эътироф этилган XIV–XVI асрлардаги Иккинчи Шарқ Уйғониш даврида ҳам жамиятда дину диёнат мустаҳкам, инсонлар дунёқарашида маънавият қадрли, давлатчилик тузумида илм-фан ва маърифат устувор бўлган.

Бир сўз билан айтганда, азалдан халқимизнинг илму фан, ижоду меҳнатга рағбати баланд бўлиб, ўзининг юксак маънавияти, имон-эътиқоди, миллий ғурури ҳамда умуминсоний қадриятларга йўғрилган гўзал одоб-ахлоқи билан ҳамиша ибрат бўлган. Шундай экан, беғубор ва муҳташам орзу-умидли ёшларимиз яратилаётган шароит ва имкониятлардан ўз вақтида оқилона фойдаланиб, Ватанимиз равнақи, халқимиз юксалишига ҳисса қўшадиган фарзандлар бўлишига ишонамиз.

Музаффар КОМИЛОВ,

Дин ишлари бўйича қўмита раисининг биринчи ўринбосари,

Ўзбекистон халқаро ислом академияси ректори

Манба: “Янги Ўзбекистон” газетаси 2021-йил 7-ноябр, 223-сон

Миср таълим вазирлиги мактаб ўқув дастурига Муҳаммад Салоҳ ҳақидаги бўлимни киритди. Болаларни нафақат Муҳаммаднинг спортдаги ютуқлари, балки фуқаролик позицияси ва хайрия фаолияти ҳам илҳомлантиради.

IslamNews маълумотларига кўра, у "миллионлаб мисрликлар учун тақлид қилиш модели" ва "бахт яратувчиси" деб таърифланади. "Салоҳнинг бошқаларга ёрдам бериш истаги ёшларга муваффақиятга эришиш учун имконият беришни хоҳлаши билан изоҳланади".

Салоҳ она қишлоғига тез ёрдам автомобилларини ҳадя қилди, қизлар учун мактаб ва сув тозалаш қурилмаларини қурди. У, шунингдек, вилоятда етим ва камбағалларга ёрдам бериш учун бир гуруҳ яратди.

Исломга эътиқод қўйган одам сифатида у мусулмонларнинг бош шаҳри шарафига қизига Макка деб исм қўйди. Макка ва унинг отасининг сурати ҳатто ўрта мактаб дарслигига жойлаштирилди.

Муҳаммад Салоҳ 1992 йил 15 июнда Басьюн шаҳри яқинидаги Нагриг қишлоғида туғилди. Болалигида Муҳаммад ҳовли футболини ўйнаган. Унинг қобилиятлари профессионал фаолиятини 2004 йилда бошлаган "Иттиҳод Басьюн" клуби эътиборини ўзига тортди. Бугун у дунёнинг энг яхши футболчиларидан бири ҳисобланади. У "Ливерпуль" ва Миср терма жамоасида ўйнайди. Англия Премьер-Лигасининг икки карра "Олтин бутса" ғолиби.

Ўзбекистон мусулмонлари идораси матбуот хизмати

“Nikoh” lug'atda jamlanish, yaqinlashish ma'nolarini anglatadi. Oila barcha zamonlarda ham muqaddas sanalib, jamiyatning bir bo`lagi hisoblanadi, uning mustahkamligi, er-xotin o‘rtasidagi mehr-muhabbat davomiyligini ta’minlash uchun dinimiz o‘ziga xos qonun-qoidalarni joriy qilib qo‘ygan.

Oilaviy hayotning asosiy tashkilotchi va a’zolari bo‘lmish er va xotinning har biriga o‘ziga xos burch va vazifalari bilan birag, bir-birlariga nisbatan haq va huquqlarini ham belgilab berilgan.

     Shariatga nikohning kiritilishining zamirida ham diniy, ham dunyoviy manfaatlar bor. Bularning bari Shori’ bo`lgan Zotning qanchalik buyuk va hakim ekanligiga dalolat qiladi.

Quyida nikohning shariatga kiritilishi hikmatlari oyatlar ila yoritib beriladi:

• Avvalo, nikohning asosini Muhammad ummati naslini ko`paytirishdir. Bunga ishora qilib Qur’oni karimda bunday keltiriladi:

﴿ وَاذْكُرُواْ إِذْ كُنتُمْ قَلِيلاً فَكَثَّرَكُمْ ﴾  [الأعراف: 86]
“Oz bo`lgan chog’ingizda sizlarni ko’paytirib qo’yganini eslang” (A’rof surasi, 86-oyat)

• Nikoh – Alloh xarom qilib qo’ygan narsalarga tushib qolishdan ham saqlovchi himoyadir:

﴿ وَلاَ تَقْرَبُواْ الزِّنَى إِنَّهُ كَانَ فَاحِشَةً وَسَاء سَبِيلا ﴾[الإسراء: 32]
“Va zinoga yaqinlashmanglar. Albatta u faxsh ish va yomon yo’ldir” (Isro surasi, 32-oyat).

Alloh taolo er-xotinni o’zaro ayblarini berkituvchi, go’zal saqlovchi bo’lishi uchun bir-birlariga libosdirlar deya quyidagi oyatda  nomladi:

                                                           ﴿ هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ﴾

“...Улар сизга либосдир, сиз уларга либосдирсиз...” (Бақара сураси, 187-оят).

• Alloh taolo nikoh asosida qurilgan oilaning a’zolari bo’lmish er-xotinni bir-birlari uchun xotirjamlik bo’lish va qalbiga o’zaro muhabbat va marhamat solib qo’yishiga quyidagi oyat dalil bo’ladi:

﴿ وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً

إِنَّ فِي ذَلِكَ لآيَاتٍ لِّقَوْمٍ يَتَفَكَّرُون﴾ [الروم: 21]

  “Va Sizlarga sokinlik topishingiz uchun o’zingizdan juftlar yaratdi va oralaringizda sevgi va marhamatni solib qo’yganligi (ham) uning oyat- belgilaridandir” (Rum surasi, 21-oyat).

     Nikoh nafaqat dunyoviy manfaat keltiradi, balki uxroviy jihatdan ham er-xotin vojibotlariga rioya qilish bilan va’da qilingan ajrlarga ega bo’linadi. Islom hech qachon insonning haqini poymol bo’lishiga yo’l qo’ymaydi, balki u xoh erkak bo’lsin, xoh ayol uni himoya qiladi. Ayol kishini ojiza qilinishi va qiyshiq qovurg’adan yaratilishi bu uning past sanalishidan emas, balki mo’tabar sanalishidandir. Erkak kishini hamisha ustunligi – oilada uning hurmati va mas’ulligi jahatdandir.

Xulosa qilib aytadigan bo’lsak, halol nikoh ko’p muomolatlar ichidan afzallik jihatdan yuqori o’rinda turuvchi, insonga har tomonlama manfaat keltiruvchi jamiyatning bir bo’lagi hisoblanadi. Oila qanchalik pok va shariat ahkomlariga muvofiq bo’lsa, shunchalik mustahkam bo’ladi.

Mohira Orifjonova,

Toshkent Islom instituti

talabasi