Туркиянинг жануби-шарқий қисмидаги вилоятларда юз берган кучли зилзила оқибатида кўплаб одам қурбон бўлгани ва жиддий жароҳат олгани, катта талафотлар кўрилгани муносабати билан Ўзбекистон Президенти Шавкат Мирзиёев Туркия Президенти Режеп Таййип Эрдоғанга ҳамдардлик йўллади.

Қардош Туркия етакчиси ва халқига чуқур таъзия изҳор этиб, давлатимиз раҳбари вафот этганларнинг оила аъзолари ва яқинларига ҳамдардлик билдирди, жабрланганлар тез фурсатда соғайиб кетишини тилади.

Ўзбекистон мусулмонлари идораси раиси, муфтий Нуриддин домла ҳазратлари ташаббуслари билан “Умра – 2023” мавсуми зиёратчиларига хизмат кўрсатадиган барча ҳудудлардаги гуруҳ раҳбарларига (элликбошилар) "ZOOM" дастури орқали онлайн ўқув машғулот ўтказиш йўлга қўйилди. Мазкур онлайн машғулотлар элликбошилар учун муборак сафар олди ҳафтада икки марта ташкил этилади.

Ўқув машғулотларини Ўзбекистон мусулмонлари идораси Фатво маркази уламолари томонидан олиб борилмоқда. Улар гуруҳ раҳбарларига умра амалини адо этишнинг шаръий аҳкомлари, хусусан, умранинг фарз ва вожиблари, эҳромга кириш, тавоф ва саъй қилиш тартиб-қоидалари, умра қилиш асносида ман этилган амаллардан сақланиш, шунингдек, Мадинаи мунаввара ва Маккаи мукаррамадаги муборак жойларни зиёрат қилиш одоблари ҳақида сўзлаб берадилар.

Шунингдек, уламолар гуруҳ раҳбарлари зиёратчиларга муборак сафарда хушмуомала бўлиш, бир-бирига ёрдам кўрсатиш, зикру ибодатларни кўпайтириш, беҳуда нарсаларни тарк этиш ҳақида ҳам эслатиб туриши лозимлигини алоҳида таъкидланади. Шунингдек, элликбошиларни қизиқтирган саволларга уламолар жавоб беради.

Шу ўринда таъкидлаш жоизки, Саудия Арабистонида ҳам Ўзбекистон зиёратчиларига хизмат кўрсатувчи ишчи гуруҳи таркибида Фатво марказининг бир нафар вакили гуруҳ раҳбарларига йўл-йўриқ кўрсатиш билан бирга зиёратчиларнинг шаръий саволларига батафсил жавоб бериб ҳам келмоқда.

Ўзбекистон мусулмонлари идораси Матбуот хизмати

Бугун, 6 февраль куни Урганч шаҳрида диний соҳа ходимлари иштирокида аҳоли орасида юқумли касалликларни олдини олиш ва эмлашнинг аҳамиятига бағишланган ўқув-семинар бўлиб ўтди. Унда UNICEF жамғармасининг мутасадди вакиллари, Диний идора ва Дин ишлари бўйича қўмита масъул ходимлари, Қорақолпоғистон Республикаси ва Хоразм вилоятида фаолият юритаётган имом-хатиб ҳамда отинойилар иштирок этди.

Мазкур семинар Ўзбекистон мусулмонлари идораси, Дин ишлари бўйича қўмита ва БМТ UNICEF жамғармасининг Ўзбекистондаги ваколатхонаси ҳамкорлигида ташкил этилди.

Ўқув-семинар давомида Ўзбекистон мусулмонлари идораси Масжидлар билан ишлаш бўлими мудири Музаффар домла Камолов Исломда аҳоли саломатлигини мустаҳкамлаш ва эмлаш масаласи ҳақида маъруза қилиб, динимизда инсон саломатлигини асрашга алоҳида эътибор берилиши ҳамда тиб илмида пешқадам бўлган мусулмон олимлари юқумли касалликларга қарши эмлашни тиббиётга биринчи бўлиб олиб киргани таъкидлади.

У нутқи давомида бугун аҳоли саломатлигини сақлаш нафақат тиббиёт ходимлари, балки жамиятдаги барчани бурчи эканини таъкидлади. Шунингдек, бу борада Ўзбекистон мусулмонлари идораси томонидан кенг кўламли ишлар амалга оширилаётгани, хусусан, юқумли касалликлардан сақланиш борасида динимиз кўрсатмаларини аҳолига етказиш билан бирга, шифокор маслаҳатига риоя қилиш лозимлиги борасида ҳам тушунтириш-тарғибот ишлари олиб борилаётганини қайд этди.

Шунингдек, тадбирда UNICEF жамғармаси, Дин ишлари бўйича қўмита вакиллари ва соҳа мутахассислари ҳам маъруза қилишди.

Маълумот ўрнида, UNICEF Ўзбекистонда 1994 йилдан буён самарали фаолият юритиб келади. Бирлашган Миллатлар Ташкилотининг Бош Ассамблеяси томонидан болалар ҳуқуқларини ҳимоя қилиш, уларнинг асосий ҳаётий эҳтиёжларини қондиришга кўмаклашиш ва салоҳиятларини ҳар томонлама ривожлантириш масалалари UNICEFга тақдим этилган.

Ўзбекистон мусулмонлари идораси, Дин ишлари бўйича қўмита ва БМТ UNICEF жамғармасининг Ўзбекистондаги ваколатхонаси ўртасида ушбу йўналишларда ҳамкорлик алоқаларини йўлга қўйиш мақсадида Англашув Меморандуми имзоланган эди.

Бугунги семинар ҳам мазкур Меморандумда белгиланган ҳамкорлик доирасида ташкил этилди.

Ўзбекистон мусулмонлари идораси
Матбуот хизмати

Ўзбекистон мусулмонлари идораси жамоаси “Хожа Бухорий” ўрта махсус ислом билим юрти мудир ўринбосари Музаффар домла Қосимовнинг волидаи муҳтарамалари вафоти муносабати билан марҳумнинг яқинларига чуқур таъзия билдиради.

Аллоҳ таоло марҳум онахоннинг барча солиҳ амалларини ўзларига ҳамроҳ айлаб, Ўз мағфиратига олсин.

Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларига ажру мукофотлар ато этсин.

Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан марҳум онахоннинг яқинларига, хусусан, Музаффар домла Қосимовга ҳамдардлик билдирамиз.

Иннаа лиллааҳи ва иннаа илайҳи рожиъуун.

«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».

Ўзбекистон мусулмонлари идораси

Имом Бухорий номидаги Тошкент ислом институтида “Январь – “Араб тили ва балоғат фан ойлиги” муносабати билан талабалар ўртасида “Китоб – севимли дўст” шиори остида китобхонлик викторинаси ўтказилди.

Мазкур танлов шартига кўра, рўйхатда кўрсатилган китобларни мутолаа қилган талабалар ўртасида ўтказилган мусобақа ҳакамлар ҳайъат аъзолари томонидан юқори баҳоланди.

Унинг якунида ғолиб деб топилган тўрт нафар китобхон талабага ноутбук, планшет ва телефон каби қимматбаҳо совғалар тақдим этилди. Шунингдек, викторинада фаол қатнашган талабалар ҳам эсдалик совғалар билан тақдирланди.

Якуний натижага кўра ўғил болалар орасидан қуйидаги талабалар ғолиб деб топилди:
1-ўрин: Мухтаров Исроилжон – ноутбук;
2-ўрин: Зикряев Ҳожимурод ва Икромжонов Абубакр – планшет;
3-ўрин: Исмоилов Абдулазиз – телефон.

Аёл-қизлар ўртасида эса қуйидаги талабалар ғолиб бўлди:
1-ўрин: Муротова Нодира – ноутбук;
2- ўрин: Солиева Муслима – планшет;
3- ўрин: Зиннура Наимова – ошхона жиҳози;
4- ўрин: Баракаева Моҳибону – ошхона жиҳози;
5-ўрин: Мухаммадназирова Ҳусния – ошхона жиҳози.

Тошкент Ислом институти Матбуот хизмати