Расулуллоҳ соллаллоҳу алайҳи васалламнинг пиёлалари

Осим Аҳвал розияллоҳу анҳу айтади: «Расулуллоҳ соллаллоҳу алайҳи васалламнинг пиёлаларини Анас ибн Моликнинг уйида кўрдим, у дарз кетган бўлиб, дарзи кумуш занжир билан боғлаб қўйилган эди. У соф ёғочдан қилинган, каттагина бир яхши пиёла эди. Анас: “Мен бу пиёлада Расулуллоҳ соллаллоҳу алайҳи васалламга фалон ва фалон

мартадан ортиқ сув ичирганман”, деб айтган эди».

Ибн Сирин раҳматуллоҳи алайҳ бундай дейди: «Пиёланинг темир ҳалқаси бўлиб, Анас унинг ўрнига олтин ёки кумуш ҳалқа ўрнатмоқчи бўлди. Шунда Абу Талҳа Анасга: “Расулуллоҳ соллаллоҳу алайҳи васалламнинг ўрнатиб қўйган нарсаларини ўзгартирма!” деди. Анас темир ҳалқани ўз жойида қолдирди» (Имом Бухорий ривояти).

Собит Буноний дейди: «Анас розияллоҳу анҳу бир кун бизларга бир ёғоч ва темир билан қадоқ қилинган ёғоч пиёлани олиб чиқиб кўрсатиб: “Бу Расулуллоҳ соллаллоҳу алайҳи васалламнинг пиёлалари эди”, деди» (Имом Термизий ривояти).

Аллоҳумма солли ва саллим аъла Муҳаммадин ва аъла оли Муҳаммад.

Даврон НУРМУҲАММАД

4 февраль куни мамлакатимиз элчихонаси кўмагида Ўзбекистон Ислом цивилизацияси маркази директори Шоазим Миноваров ва Малайзия Ислом цивилизацияси институти (МИЦИ) Бош директори Фариза Шом ўртасида видеоконференция ташкил этилди, хабар бермоқда "Жаҳон" АА.

Телеконференция давомида Малайзия томони 2018 йилда ташкил этилган Ислом цивилизацияси маркази фаолияти билан танишди. Хусусан, унинг асосий мақсадлари маърифатли Исломни ўрганиш, шунингдек, диний-маърифий тадбирлар ва халқаро илмий-амалий анжуманлар ташкил этиш орқали Ўзбекистон олим ва мутафаккирларининг буюк мероси ҳақида аҳоли ва халқаро ҳамжамиятнинг хабардорлигини оширишдан иборат эканлиги алоҳида таъкидланди. Марказ фаол фаолиятни олиб бормоқда ва бу соҳаларда халқаро ҳамкорликни ривожлантиришга тайёр эканлиги таъкидланди.

Ўз навбатида Фариза Шом Ислом цивилизацияси бешиги ва замонавий илм-фан ривожига беқиёс ҳисса қўшган дунёга машҳур олим ва мутафаккирларнинг ватани бўлмиш Ўзбекистон Малайзиянинг илмий-академик ҳамжамиятида катта қизиқиш уйғотаётганини таъкидлади.

Шу билан бирга, мазкур йўналишдаги ҳамкорликнинг илк қадами сифатида томонлар 8-9 апрель кунлари "Ислом цивилизациясининг буюк алломалари"мавзусида қўшма онлайн-семинар ташкил этишга келишиб олдилар. Семинарнинг асосий мақсади буюк ўзбек мутафаккирларининг Ислом цивилизацияси, жумладан, илоҳиёт, Ислом ҳуқуқи, тарих, фалсафа, математика, астрономия ва тиббиёт ривожига қўшган салмоқли ҳиссасини очиб бериш ҳамда илмий-тадқиқот ва билим алмашиш, икки мамлакат илмий муассасалари ўртасидаги илмий ҳамкорликни мустаҳкамлашдан иборат.

Бундан ташқари, Ўзбекистон Ислом цивилизацияси маркази раҳбарияти икки муассаса фондларида сақланаётган нодир қўлёзмалар ва литографик китобларнинг каталоглари билан алмашиш муҳимлигини таъкидлади. Бу қўшма тадқиқотлар ўтказиш учун зарур бўлган Ўзбекистон ва Малайзиядаги диний тадқиқот марказларининг илмий ресурсларини кенгайтириш имконини бериши қайд этилди.
Шунингдек, Ўзбекистон ва Малайзияда дин соҳасида ўтказилаётган тадбирлар ва тадқиқотлар ҳақида икки мамлакат жамоатчилигининг хабардорлигини ошириш учун МИЦИ ва ЎИЦМ журналларида юқорида кўрсатилган марказлар вакилларининг илмий-тадқиқотчилик ишларини мунтазам равишда нашр этиб бориш таклиф этилди.

Тадбир якунлари натижасида томонлар жорий йилнинг март ойи бошида юқоридаги соҳалардаги ҳамкорлик тўғрисидаги битимни онлайн тарзда имзолаш маросимини ўтказишга келишиб олдилар.

Ўзбекистон мусулмонлари идораси матбуот хизмати

Аввал хабар бериб ўтганимиздек, зиёрат туризм дастури доирасида покистонлик зиёратчиларнинг юртимизга ташрифи режалаштирилган эди. Куни кеча дастлабки зиёратчилар мамлакатимизга етиб келдилар.

Меҳмонлар, дастлаб, Тошкент шаҳридаги Ҳазрати Имом мажмуасида бўлиб, Усмон Мусҳафи, Бароқхон мадрасаси ва Қаффол Шоший зиёратгоҳлари билан яқиндан танишдилар. Шунингдек, зиёрат дастури доирасида Қатағон қурбонлари хотира музейи, Темурийлар тарихи давлат музейи, Алишер Навоий номидаги Ўзбекистон Миллий кутубхонаси ва бошқа шу каби диққатга сазовор масканларда бўлдилар.Эслатиб ўтамиз, зиёратчиларнинг кейинги манзили Самарқанд, Бухоро ва Хоразм вилоятларидаги зиёратгоҳ ва қадамжолар.

Меҳмонларнинг ташрифи Дин ишлари бўйича қўмита, Ўзбекистон мусулмонлари идораси ҳамкорлигида "Real Dreams" туристик компанияси томонидан ташкил этилмоқда.

Дин ишлари бўйича қўмита

Ахборот хизмати

Жорий йил 8-феврал куни билим юртида ўқитувчи ва талабалар иштирокида  ЎМИ раиси ўринбосари Ў.Ҳасанбоев билан “Дин ниқобидаги экстремизм -  ёшларнинг келажаги учун таҳдид” мавзусида очиқ мулоқот тарзида учрашув бўлиб ўтди.

Учрашув аввалида билим юрти мудири А.Бобамирзаев иштирокчиларга бугунги тадбир мавзуси, аҳамиятига тўхталиб, сўз навбатини Ў.Ҳасанбоевга берди.

Ў.Ҳасанбоев ўз сўзида кейинги пайтда юртимизда ёшларга бўлган эътиборнинг орттирилгани, уларни ҳар томонлама қўллаб қувватлаш борасида олиб борилаётган ишлар ҳамда долзарб вазифаларга алоҳида тўхталиб бевосита мавзу юзасидан маълумотлар тақдим этиб ўтди.

Ҳусусан, Ўзбекистон азалдан кўп миллатли ва турли динларга эътиқод қилувчи халқлар тинч-тотув яшаб келган юрт экани, аждодларимиз ҳар доим шу юртда бирга яшаган бошқа дин вакилларига ҳурмат ва бағрикенглик билан муносабатда бўлишгани, уларнинг Ватан тараққиёти йўлида елкадош бўлиб меҳнат қилгани тарихий манбаларда ўз аксини топиб келаётгани ҳақида тўхталди.

Айни дамда оммавий ахборот воситаларида Яқин Шарқ ва бошқа ҳудудлардаги қатор мамлакатлар чуқур сиёсий танглик, ижтимоий ва иқтисодий беқарорлик ва қуролли тўқнашувларни бошидан кечираётганини гувоҳи бўлмоқдамиз. Гўёки ҳақиқий “исломий давлат” қуриш шиори остида очиқдан-очиқ зўравонлик, инсонийликка зид ваҳшийликларга асосланган амалларга қўл ураётган турли гуруҳ ва жамоалар урчиб кетгани, уларга ўз навбатида муносиб раддиялар бериб бориш лозимлиги такидланди.

Мутаассиб оқим аъзоларининг мақсадлари - мусулмонлар учун ўта аҳамиятли бўлган нозик тушунчалар – “кофирга чиқариш”, “ҳижрат”,  “жиҳод”, “шаҳидлик”, кабиларни бузиб талқин қилиш орқали ёшларимизни оиласи ва ўз яқинларининг таъсиридан чиқариш, ўқиш ёки ишидан ажратиб олиш ҳамда уларни қуролли тўқнашувлар кечаётган Сурия ва Ироқ каби мамлакатларга жўнатиб, манқурт-жангари ёки “тирик бомба”га айлантиришдан иборат экани, диний соҳа вакиллари бундай бузуқ талқинларга ёш авлодлар алданиб қолмаслиги учун тинимсиз меҳнат қилишлари шарт экани таъкидлаб ўтилди.

Муҳтарам Президентимиз Ш.Мирзиёев таъкидлаганларидек: “Бугунги тез ўзгараётган дунё инсоният олдида, ёшлар олдида янги-янги, буюк имкониятлар очмоқда. Шу билан бирга, уларни илгари кўрилмаган турли ёвуз хавф-хатарларга ҳам дучор қилмоқда. Ғаразли кучлар содда, ғўр болаларни ўз ота-онасига, ўз юртига қарши қайраб, уларнинг ҳаётига, умрига зомин бўлмоқда. Бундай кескин ва таҳликали шароитда биз ота-оналар, устоз-мураббийлар, жамоатчилик, маҳалла-кўй бу масалада ҳушёрлик ва огоҳликни янада оширишимиз керак. Болаларимизни бировларнинг қўлига бериб қўймасдан, уларни ўзимиз тарбиялашимиз лозим”, дея кўп таъкидлашлари бежизга эмаслиги, бунинг замирини чуқур англаб етиш кераклиги тавсия этилди.

Шундай вазиятда диний таълим муассасалари талабалари, имом-хатибларнинг хизматлари беқиёс. Чунончи, улар юртимизда диний соҳада амалга оширилаётган улкан ислоҳотлар моҳиятини алоҳида,  хусусан, билиб-билмай адашиб турли оқимлар таъсирига тушиб қолган ёшларга аниқ мисоллар асосида тушунтириб бериши лозим.

Дўстона ва очиқ мулоқот тарзида кечган йиғилишда талаба ёшлар ўзларини қизиқтирган кўплаб саволларга атрофлича жавоб олдилар.

Ташкил этилган очиқ мулоқот ва самимий суҳбатдан иштирокчилар ўзларига кўплаб ижобий таассуротлар олдилар. 

Учрашув самимий, сиёсий ҳамда кўтаринки руҳда ўтди.

Абдулносир Бобамирзаев

“Ҳидоя” ўрта махсус ислом

билим юрти матбуот котиби

Мадинада пайғамбаримиз Муҳаммад алайҳиссаломнинг ҳаётлари ва ислом цивилизациясига бағишланган халқаро кўргазма ва музей ўз фаолиятини бошлади, дея хабар бермоқда ArabNews. 

Лойиҳа Бутунжаҳон мусулмонлар лигаси томонидан амалга оширилган бўлиб, унинг доирасида бутун дунёда худди шундай музейлар очиш режалаштирилган. 

Масжиди Набавий яқинида жойлашган музей 24 соат очиқ бўлади, у ерда пайғамбаримиз Муҳаммад алайҳиссаломнинг ҳаётлари ва ислом дунёсининг тарихига бағишланган экспонатлар ўрин олган. 

Кўргазмада ўнлаб расмлар ва интерфаол дисплейлар мавжуд. Бу ерга келувчилар араб тилидан ташқари инглиз, испан, урду, француз, турк ва индонез тилларида ҳам маълумот олишлари мумкин. Шунингдек, бу ердаги 4DX кинотеатрда Муҳаммад алайҳиссаломнинг ҳаётларига бағишланган фильмлар намойиш этилади. 

Кўргазмадаги йигирма беш павильондан бирида аёлларнинг исломдаги ўрни, ислом эндигина тарқала бошлаган пайтда аёллар қандай рол ўйнагани ҳақида ҳикоя қилинади.

azon.uz