Rasululloh sollallohu alayhi vasallam aytdilar: “Kishining go'zalligi uning tilidan bilinadi” (Imom Hokim rivoyati);

– “Hamma ishlaringizda to'g'ri bo'ling, odamlarga muomalada xulqingiz chiroyli bo'lsin!” (Imom Tabaroniy, Imom Hokim rivoyati);

– “Haqiqiy musulmonning qo'lidan ham, tilidan ham musulmonlar ozor ko'rishmaydi” (Imom Muslim rivoyati).

Siyrat kitoblarida Rasululloh sollallohu alayhi vasallamning juda kam gapirishlari, gapirganlarida ham, bo'lib-bo'lib, aniq so'zlashlari bayon etilgan. U zot alayhissalomning muborak yuzlarini ko'rgan bir sahroyi arab: “Guvohlik beraman, bu yuz yolg'onchilarniki emas”, deb Islom dinini qabul qilgan. Zero, Payg'ambarimiz sollallohu alayhi vasallam go'zal xulqli inson edilar. Ul zot bizlarni ham yaxshi xulqli bo'lishga chaqirganlar.

Hadisda: “Kim Allohga va oxirat kuniga imon keltirgan bo'lsa, yaxshi so'zlarni gapirsin yoki sukut saqlasin”, deyilgan (Imom Buxoriy, Imom Muslim rivoyati).

Dunyo va oxirat uchun foydali so'zlarni so'zlab, foydasiz gaplardan tiyilish faqat yaxshilik keltiradi. Yana Payg'ambarimiz sollallohu alayhi vasallam: “Kishining har bir eshitgan narsasini gapiraverishi gunohkor bo'lishiga kifoyadir”, deganlar.

Odam bir gapni aytishdan oldin yaxshilab o'ylab ko'rishi kerak. Agar aytmoqchi bo'lgan so'zi yaxshi bo'lsa, savob keltirsa, gapirgani tuzuk. Bordiyu aytmoqchi bo'lgani yomonliklarni qo'zg'aydigan, yaxshilikka shubha uyg'otadigan bo'lsa, tilini tiysin. Odam har bir gapi uchun javob beradi. Og'izdan chiqqan har bir so'z gapiruvchining foydasiga yoki zarariga xizmat qiladi. O'ylamasdan aytilgan so'z bilan yaqin do'st goho dushmanga aylanib qolishi mumkin.

Manba: islom.uz