So'nggi kunlarda internet saytlari va ijtimoiy tarmoq sahifalari orqali "Saudiya Arabistoni Ramazon oyida COVID-19 ga qarshi emlangan ziyoratchilarga haj safari uchun ruxsat beradi" kabi mazmundagi xabarlar tarqalmoqda.

Avval xabar berilganidek, hozirda Saudiya Arabistonida koronavirus pandemiyasi sababli qat'iy karantin cheklovlari joriy etilgan.
Shu o'rinda, Haj va Umra tadbirlari borasidagi yangiliklar hamda tashkiliy ishlar masalasida Din ishlari bo'yicha qo'mita Saudiya Arabistoni rasmiylari hamda Haj va Umra ishlari bo'yicha Attashe bilan muntazam aloqa o'rnatgan.

Shundan kelib chiqib, quyidagilarni ma'lum qilamiz:

Aslida, 2021 yil RAMAZON oyida Umra qilish, namoz o'qish va ziyoratga kelish uchun ruxsatnoma olish tartibi va sog'liqqa qo'yiladigan talablar e'lon qilingan, unga ko'ra, vaktsinatsiya qilingan va to'liq immunitetga ega bo'lgan fuqarolar mazkur amallarni bajarish uchun Baytullohga kirishlari mumkin;

Mazkur cheklovlar Ramazon mavsumiga taalluqlidir.

Eslatib o'tamiz, Haj va Umra tadbirlarini tashkil etish bo'yicha Saudiya Arabistoni hukumati tomonidan hozirga qadar hech qanday rasmiy qaror e'lon qilinmagan.

Hurmatli yurtdoshlar!
Haj va umra ziyoratlari bilan bog'liq asosli ma'lumotlar Din ishlari bo'yicha qo'mitaning rasmiy veb-sayti va ijtimoiy tarmoq sahifalari orqali e'lon qilinadi.

Din ishlari bo'yicha qo'mita
Axborot xizmati