Samarqand viloyati bosh imom-xatibligi tashabbusi bilan Qo‘shrabot tumanida «Inson qadri uchun» tamoyili asosida keng ko‘lamli ma’naviy-ma’rifiy va xayriya tadbirlari o‘tkazildi. Viloyat bosh imom-xatibi o‘rinbosari Nursultonxon domla Abdumannonov boshchiligidagi shahar va tuman bosh imom-xatiblari, iqtidorli ulamolar hamda "Haj – 2025" ziyoratchilaridan iborat ishchi guruhi tumandagi 16 ta mahallada bo‘lib, 80 dan ortiq xonadonlar holidan xabar oldilar.

Bu samimiy muloqotlar davomida ehtiyojmand va boquvchisini yo‘qotgan oilalarga moddiy-ma’naviy ko‘mak berildi, bemorlar ziyorat qilinib, ko‘ngillari tog‘dek ko‘tarildi. Shuningdek, mahalla faollari bilan hamkorlikda oilaviy nizolarni bartaraf etish va adashgan shaxslarni sog‘lom hayotga qaytarish bo‘yicha yakkama-yakka tarbiyaviy suhbatlar o‘tkazildi.

Ma’naviy-ma’rifiy ishlar atrof-muhit obodligi bilan uyg‘unlashib ketdi. "Yashil makon" loyihasi doirasida "Baliqchi ota" jome masjidi hududiga imomlar tomonidan manzarali daraxt ko‘chatlari qadaldi. Bu xayrli amal dinimiz ko‘rsatmasiga munosib javob bo‘lib, kelajak avlod uchun qoldirilgan chinakam merosdir.

Tadbir yakunida tuman masjidlarida peshin namozidan so‘ng ma’rifiy ma’ruzalar tashkil etilib, yurtimiz tinchligi va xalqimiz farovonligi so‘rab xayrli duolar qilindi. Bu kabi tadbirlar xalq bilan yaqin bo‘lish, inson dardini tinglash va jamiyatda mehr-oqibat muhitini mustahkamlashning eng oliy namunasi bo‘ldi. 

O‘zbekistonton musulmonlari idorasi

Samarqand viloyati vakilligi
Matbuot xizmati