2026 yil 17 fevral kuni O‘zbekiston musulmonlari idorasi Fatvo markazi ulamolari hijriy 1447 yil Ramazon oyi hiloli ko‘rinmaganini ma’lum qiladi. Shuningdek, O‘zbekiston Respublikasi Fanlar akademiyasi Astronomiya institutining taqdim etgan ma’lumoti ham mazkur kuzatishlarni tasdiqladi. Shu bois, joriy yil 18 fevral kunini hijriy 1447 yil Sha’bon oyining o‘ttizinchi kuni, Ramazon oyining birinchi kuni esa shu yilning 19 fevral kuniga to‘g‘ri kelishi haqida qaror qabul qilindi.
Quyidagi aksar mamlakatlar ham Ramazon oyining birinchi kunini shu yilning 19 fevral kuni, deb e’lon qildi:
Misr Arab Respublikasi
Iordaniya
Suriya
Iroq
Eron
Turkiya
Qozog‘iston
Qirg‘iziston
Tojikiston
Turkmaniston
Ozarbayjon
Indoneziya
Bruney
Ummon
Singapur
Avstraliya
Yaponiya
Pokiston
Hindiston
Malayziya
Janubiy Koreya
Liviya Arab respublikasi
Rossiya Federatsiyasi
Bangladesh
Tunis
AQSH
Shuningdek, Yevropa fatvo va tadqiqotlar kengashi hamda Shimoliy Amerika hilol qo‘mitasi tomonidan joriy yil 19 fevral kunini Ramazon oyining birinchi kuni, deb e’lon qilindi. Yangi oy ko‘rilmagani sababli Sha’bon oyi 30 kunga to‘ldirildi.
O‘zbekiston musulmonlari idorasi
Matbuot xizmati
Hurmatli Prezidentimizning «Ramazon – mehr-muruvvat, ahillik va shukronalik oyi» degan ezgu g‘oyasi asosida Toshkent viloyatida ehtiyojmand, boquvchisini yo‘qotgan oilalarga iftorlik dasturxonlari yozilyapti.
Bu xayrli ishda diniy soha xodimlari bilan birga davlat va jamoat tashkilotlari vakillari ham faol qatnashyapti.
Chinoz tumani imomlari tashabbusi bilan hududdagi 40 ta mahallada ehtiyojmand xonadon ahllari uchun iftorlik dasturxonlari yozildi.
* * *
Qibray tumani «Hoji Turob o‘g‘li hoji Abdulloh» jome masjidi imom-xatibi Bahodir domla Toshkent davlat Agrar universiteti rahbariyati, professor-o‘qituvchilari, Bobur nomidagi mahalla raisi, faollar bilan birgalikda mazkur mahallada yashovchi boquvchisini yo‘qotgan oilaga iftorlik qilib berishdi.
* * *
Parkent tumani «Beshkappa» masjidi imom-xatibi Mirshavkat domla To‘ychiyev muhtoj bir oilaga iftorlik tashkil qildi.
* * *
Ohangaron tumani «Sanam» mahallasida yashovchi ehtiyojmand oilaga Toshkent viloyati suv ta’minoti AJ mas’ullari Ohangaron tuman imomlari bilan birgalikda ixcham va samimiy iftorlik dasturxoni yozildi.
* * *
Olmaliq shahar «Hilol» masjidi imom noibi Murtazoxon domla Abdullaxonov «Ko‘rpasoy» mahallasida yashovchi boquvchisini yo‘qotgan xonadon uchun iftorlik dasturxoni yozib, ularning ko‘nglini ko‘tardi.
Shahardagi «Ramazoni sharif» masjidi imom noibi Muhriddin domla Ismoilov Abdulla Avloniy nomidagi mahallada yashovchi jismoniy imkoniyati cheklangan fuqaroga homiylar ko‘magida iftorlik uchun zarur mahsulotlarni yetkazib berdi.
* * *
Quyi Chirchiq tumani «Paxtazor» mahallasida tumandagi 34 ta mahallada yashovchi ehtiyojmand xonadonlar uchun iftorlik dasturxonlari yozilib, saxovat va hamjihatlik muhiti yanada mustahkamlandi.
* * *
Toshkent viloyati bojxona boshqarmasi xodimlari hamda tuman bosh imom-xatibi Farhod domla Qoraboyev Oqqo‘rg‘on tumani «Qo‘rg‘ontepa» mahallasida istiqomat qiluvchi II guruh nogironi, boquvchisiz va ijtimoiy himoyaga muhtoj bir fuqaroga iftorlik tashkil etishdi.
* * *
Bunday misollarni yana ko‘plab keltirish mumkin.
Alloh taolo ehsonlarni qabul aylasin!
Toshkent viloyati vakilligi
Matbuot xizmati