O‘zbekiston musulmonlari idorasi tasarrufidagi diniy ta’lim muassasalari talabalarini jismonan sog‘lom, axloqiy barkamol etib tarbiyalash hamda ular o‘rtasida sog‘lom turmush tarzini targ‘ib qilish maqsadida an’anaviy “Barkamol avlod” sport musobaqalari o‘tkazib kelinmoqda.
Shu munosabat bilan bugun, 13 aprel kuni "Imom Termiziy" o‘rta maxsus islom ta’lim muassasasida mazkur sport o‘yinlarining hududiy saralash bosqichi bo‘lib o‘tdi. Talabalar sportning milliy kurash, tosh ko‘tarish, stol tennisi va shaxmat turlari bo‘yicha o‘zaro kuch sinashib, eng mahoratli sportchilar aniqlab olindi.
Musobaqaning yakuniy natijalariga ko‘ra, milliy kurash yo‘nalishida Yaqub Abdug‘afforov (201-guruh), tosh ko‘tarishda Islomjon Mirzaliyev (202-guruh), stol tennisi bo‘yicha Sirotulloh Rahmatullayev (402-guruh) hamda shaxmat bahslarida Feruz Choriyev (402-guruh) birinchi o‘rinni egallab, mutlaq g‘oliblikni qo‘lga kiritdilar.
Saralash mezonlariga to‘liq javob bergan ushbu talabalar joriy yilning 23-24 aprel kunlari Samarqand viloyatidagi Hadis ilmi maktabida bo‘lib o‘tadigan “Barkamol avlod – 2026” musobaqasining Respublika bosqichida ishtirok etish uchun yo‘llanmani qo‘lga kiritdi.
“Imom Termiziy” madrasasi
Matbuot xizmati
#xabar #haj2026 #ellikboshi #vazifa
Joriy yilning 13 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtiroklarida “Haj – 2026” mavsumida hojilar ibodatiga boshchilik qiluvchi guruh rahbarlarining yig‘ilishi bo‘lib o‘tdi.
Muftiy hazratlari haj qiluvchi inson Haq taoloning mehmoni ekani, shu bois haj amalini bajarayotgan kishiga ko‘mak bergan, uning og‘irini yengil qilgan inson ulug‘ ajru savoblarga noil bo‘lishini so‘zlab, har bir ellikboshi Rahmonning mehmonlariga O‘zi rozi bo‘ladigan darajada sidqidildan xizmat qilishi lozimligini alohida qayd etdilar.
Yig‘ilishda joriy mavsumni namunali o‘tkazish uchun amalga oshirilayotgan ishlar, jumladan, 300 nafardan ziyod ellikboshi saralab olingani, o‘quv-seminar mashg‘ulotlari o‘tkazilgani, ziyoratchilar bilan uchrashuvlarda e’tibor qilinishi zarur bo‘lgan masalalarga urg‘u qaratildi.
Shayx Nuriddin Xoliqnazar hazratlari o‘z so‘zlari davomida muborak safarga qadar ziyoratchilar bilan muntazam suhbatlar tashkil etish va ularda hajning tartib-qoidalari, ahkomlari, o‘ziga xos mashaqqatlarini tushuntirish hamda zikru duolar qilish va yurtdoshlarimizning barcha savollariga javob berish zarurligini ta’kidladilar.
Shuningdek, haj amaliga oid shar’iy masalalarda faqat Fatvo markazi fatvolariga rioya etish, haj safariga doir qonunchilik va me’yoriy hujjatlarni puxta bilish, o‘zaro yordam muhitini shakllantirish, zikru ibodatlarni ko‘paytirib, safarni mazmunli o‘tkazish bo‘yicha zarur tavsiyalar berildi.
Tadbir yakunida Haq taolodan bu yilgi haj mavsumi muvaffaqiyatli o‘tishini so‘rab xayrli duolar qilindi.
O‘zbekiston musulmonlari idorasi
Matbuot xizmati